Fyrir alþingiskosningar 1922 buðu fram konur úr ýmsum kvennasamtökum, einkum kvenfélögin í Reykjavík og Samband norðlenskra kvenna.
Þær komu einum manni inn, Ingibjörgu H. Bjarnason sem varð þar með fyrsta íslenska konan til að setjast á þing.
„Sigur C-listans ætti að verða oss konum örfun til að neyta réttar vors oftar við kosningar — annað hvort sem sérstakir aðiljar, eða þá sem fullir jafningar karla — en eigi sem hornrekur þeirra.“
Eitt af helstu áherslu málum framboðsins var að fá talmann Landspítalamálsins á þing.
Listinn hlaut 22, 4 % atkvæða.
Þessar konur voru á listanum:
- Ingibjörg H. Bjarnason (1868-1941). Skólastjóri.
- Inga Lára Lárusdóttir (1883-1949) Kennari í Reykjavík og ritstjóri mánaðarblaðsins 19. júní.
- Halldóra Bjarnadóttir (1873-1981) kennari á Akureyri, ritstjóri Hlínar og mikilvirk í félagsstarfi norðlenskra kvenna.
- Theódóra Thoroddsen (1863-1954) rithöfundur.
Ítarefni:
- Auður Styrkársdóttir, Kvennaframboðin 1908-1926 (Reykjavík: Örn og Örlygur 1982) bls. 45-46.
- Ártöl og áfangar í sögu íslenskra kvenna. Ritstjórar Erla Hulda Halldórsdóttir og Guðrún Dís Jónatansdóttir. (Reykjavík: Kvennasögusafn Íslands 1998) bls.109
- Gísli Jónsson, „Um landskjörið 1922 og sigur Kvennalistans“, Lesbók Morgunblaðsins 4. nóvember 1989. Bls. 4-6.
- Gísli Jónsson, „Líkamssköpulag og stjórnmál: Landskjörið 1922 og sigur Kvennalistans“, Lesbók Morgunblaðsins 11. nóvember 1989, bls. 4-5
- Kristín Ástgeirsdóttir , „„Á þessum sviðum sér auga konunnar glöggar en auga karlmannsins“ : Kvennalistinn og landskjörið 1922“. Kosningaréttur kvenna 90 ára (Reykjavík: Kvennsögusafn 2005) bls. 79-102
- Sigríður Th. Erlendsdóttir, Veröld sem ég vil: Saga Kvenréttindafélags Íslands 1907-1992 (Reykjavík: Kvenréttindafélag Íslands 1993) bls. 139-141
- Á síðunni Kosningasaga má sjá hvernig atkvæði dreifðust milli framboða